AASMAAN (Hindi Poem)

TV sent me this beautiful poem from one of his collection. I am sure, this is one of the reason he's at microsoft. Anyway..enjoy it. Hope I get to hear more often from him.

aasmaan jhukta nahin
khaDa rahta hai apni jagah
aDig, achal aur sthir
maano sabhi mushkilon aur baadhaaon ko,
sabhi aapdaaon ko,
muh chida raha ho....

aisa nahi, ki ye musibaton se parey hai
amaavas, is par bhi aati hai
har shaam, iska bhi suraj Dubta hai
taare, iske bhi TuTte hain
rang, iske bhi Dubte hain....

lekin, fir bhi,
ye sabhi rangon ko
apne andar samaa leta hai
aur har subah, bhor ki lalimaa me
aur bhi sajeev ho uthta hai
use apne andar ramaa leta hai....

sochta hun aisa aasmaan
bhale thoda hi sahi
mai apne andar bhi sanjoye hue hun
kahin na kahin chupaaye baitha hun
jise mai DhunDta rahata hun
nirantar, aviraam....

----------------------------------